E katanoata ikai te Bootaki ni Mwakuri ibukin Kateitei ao Kateimatoan Korakora (MISE) bwa ae tabe ngkai ni waaki karaoan ana Karikirake ae te South Tarawa Water Supply Project (STWSP). Uoua mai buakon kanoan te karikirake aei aika a kakawaki bwa (1) Onikan te ran ae tarika nakon ae mam (desalination) ao (2) Karokoan te ran ae itiaki nakon auti ni maeka ni kabane iaon Tarawa Teinainano ma Betio. I aan tuan te Otabwanin ao e kabaeaki te tia wakina te karikirake bwa e na karaoa te kamatebwai iaon aananga n urubwai aika ana kona n riki nakon te otabwanin man wakinan te karikirake ae bubura n aron aei. A tia ni karaoaki uoua kamatebwai bwa (1) iaon onikan te ran ae tarika nakon ae mam ao (2) karokoan te ran ae itiaki nakon auti ni maeka, ao ni koreaki uoua ribooti iaoia. Ribooti aikai a kona n noraki n taabo aikai:
- Ana Aobiti te Beretitenti (OB), Bairiki
- Aobitin MELAD, Bikenibeu
- Aobitin PUB, Betio
- Aobitin te USP, Teaoraereke
- Tabo n Tangoboki, Bairiki
- Aobitin STWSP Betio
- Aobitin BTC, Betio
- Aobitin te MOH, Nawerewere
- Aobitin TUC, Teaoraereke
- Aobitin MISE, Betio
A kona naba n reke e-copies ibukin ribooti aikai n ana website te MISE
A butimwaeaki aomata ni kabane n roko n noori ribooti aikai n taabo akana oti i eta, ao ni butimwaeaki aia kario iango ke titiraki ni kamataata. Kario iango ao titiraki ni kabane a riai ni kanakoaki nakon Te Tia Koroboki nte Botaki ibukin te Otabwanin, Aaba ao Karikirakean te Ununiki n te Tareboon nambwa ae 75228211 ke n te E-mail ae secretary@melad.gov.ki ke ni bon nikiraki nte reta n aobitin te MELAD i Bikenibeu man te tai are kanakoaki iai te katanoata aei ni karokoa 17 Ritembwa 2021.